Il plurâl

[PDF]

Par savê formâ il plurâl dai sustantîfs e dai adietîfs si cjale i fonems (= i sunôrs) intal finâl de peraule intal singolâr. Inte plui part dai câs a un fonem i rispuint dome une possibilitât di plurâl, ma a son ancje câs plui complicâts.

Une prime dispartizion si pues fâle jenfri di peraulis che a finissin par vocâl e peraulis che a finissin par consonant. Il furlan cul ladin dolomitan a son interessantis inte suaze des lenghis romanichis parcè che biel che pal plui a vebin il plurâl sigmatic (= par -s), a àn ancje peraulis che a fasin il plurâl par palatalizazion.

Peraulis che a finissin par vocâl

Lis peraulis che a finissin par vocâl si dispartissin par trê câs.

Lis peraulis par -e atone, a fasin il plurâl par -is:
la cjase -> lis cjasis, il probleme -> i problemis
Atents! la voie -> lis vois; la fertaie -> lis fertais
Chel i che si lu scrîf cence leilu (intai grups aia, aie, aio, oie) intal plurâl nancje no si lu scrîf. (Se si lu lei intal singolâr, al reste: la fie -> lis fiis.)

Lis peraulis par vocâl toniche a fasin la vocâl fuarte e a zontin un -s:
il fi -> i fîs; il re -> i rês; il Zugjò -> i Zugjôs
Atents! Peraule fûr di regule: il bo -> i bûs

Chês altris peraulis che a finissin par vocâl a zontin un -s e vonde:
il museu -> i museus, il metodi -> i metodis
Atents! Lis peraulis che a finissin par vocâl+li a van tratadis intal grup des finâls consonantichis par -l.

Peraulis che a finissin par consonant

Pal plui lis peraulis che a finissin par consonant a formin il plurâl zontant un -s:
la clâf -> lis clâfs, il cjan -> i cjans, il clap -> i claps

Co intal finâl o vin za un -s, la peraule no mude: il pes -> i pes, il vues -> i vues

Co intal finâl de peraule si cjate un -t oben un -ç, l' S che lu scrivìn al forme un digram e la pronunciazion e je chê dal Z di zucar e di azion:
il fat -> i fats, il mieç miluç -> i mieçs miluçs
Atents! Braç al à i plurâi braçs e bracis.

La palatalizazion si le fâs:

• simpri cun:
  • i masculins par -l:
    il cjaval -> i cjavai, il gjornâl culturâl -> i gjornâi culturâi (ma tal feminin: lis rivistis culturâls);
  • lis peraulis che a finissin par vocâl+li:
    il cerneli -> i cernêi, il voli -> i vôi (ma cu la consonant: il cercli -> i cerclis)
    Atents!
    • Pal plui denant di -li e je une vocâl fuarte, che dentri di peraule no si le segne cul acent dopli ^, ma intal diftonc finâl sì: il zenoli -> i zenôi.
    • Lis peraulis vieli e spieli a àn doi plurâi: viêi/vielis, spiêi/spielis.
  • lis peraulis par -st:
    il turist -> i turiscj, trist -> triscj, onest -> onescj
• cualchi volte cu lis altris peraulis par -t:
  il fat -> i fats, il dint -> i dincj

Lis peraulis che a finissin par -cj a puedin fâ il plurâl sedi sigmatic sedi palatalizât:
il pastrocj -> i pastrocj/pastrocjs

A doplein il plurâl bon -> bogns e an -> agns (ma ancje: ans, agn). Un altri câs cuntun plurâl sigmatic e un palatâl: om -> umign = oms.

Spieli

finâl	feminin	esempli	masculin	esempli
-e	-is	cjase -> cjasis	-is	probleme -> problemis
vocâl toniche	vocâl fuarte + -s	tribù -> tribûs	vocâl fuarte + -s	fi -> fîs
vocâl atone	-s	radio -> radios	-s	metodi -> metodis
consonant la pluipart	-s	clâf -> clâfs	-s	clap -> claps
-s	-s	surîs -> surîs	-s	vues -> vues
-ç	-çs	leç -> leçs	-çs	poleç -> poleçs
-t	-ts	gnot -> gnots	-ts ‚ -cj	fat -> fats dint -> dincj
-st			-scj	turist -> turiscj
-l	-s	piel -> piels	-i	cjaval -> cjavai
vocâl +li			vocâl +i	voli -> vôi
-cj			-cjs = -cj	pastrocj -> pastrocjs pastrocj -> pastrocj