Storie: prime di Rome

Preistorie. Daprûf dal Friûl, tal Cjars, i archeolics a àn cjatât lis olmis dal om za pal Paleolitic inferiôr (-1.750.000/-250.000). In Cjargne, intes Alps Juliis e inte Alte, di Là da l¹Aghe, si à cjatât alc pal Paleolitic di mieç (-250.000/-40.000). Dut câs i prins risultums che ju vin di une culture postadice a vegnin dal Neolitic (-4.000/-2.500). Un paîs di contadins di -5.000 agns lu àn studiât ben e no mâl a Samardencje dongje Puçui. De preistorie o de protostorie a son ancje lis sgriadis (simbui) intai claps daprûf di Ciât dongje Midun.

Inte Ete dal Bronç (-XVI/X) o vin lis primis voris che a mudin la forme dal pêl dal teren: lis sapulturis a tombul e i cjastelîrs. La culture des sapulturis a tombul (-XVI/XIV) e je la prime cuntune filusumie sô che le cjatìn in Furlanie. E somee di jessi chê che e à menât dongje il concet di citât, cemût che nus al à vût pandût Lewis Mumford: inte societât e je une cengle che e je buine di scombati e di chest fat int vegnin podê e lustri. Cun lôr e rive une gnove arme, di doprâle cuintri umign e no par cjaçâ: la spade.

Il lustri sociâl al domande une sapulture fûr dal ordenari. Il muart si lu met intune cjamarute di clap e parsore i si ingrume il tombul (ancje tombe o mutare). I vuerîrs a son a stâ intun lûc cun tor ator une cortine: il cjastelîr. In mont lu fasin sù cui claps e i dan forme di cercli, lant daûr dai caratars dal teren. Intal plan a tirin sù un rivâl cuadri di tiere, indreçât daûr dai cuatri cjantons dal mont.

A di cheste culture chi i vignì daûr chê daj cjamps di urnis (-XII/IX), dulà che al gambie il mût di sapulî i muarts. Chescj popui o almancul chestis inficjis culturâls a rivarin in Friûl de Europe di Mieç dilunc de vie dal lambri. Chê impuartante strade di cumierç e partive dal Baltic par vignî jù pe Moravie e pe Boemie; daspò passadis lis Alps, e jentrave in Friûl dal Pas di Mont di Crôs e, plui indenant tal timp, ancje de bande di Pleç, par rivâ in Adriatic sot Acuilee e a San Zuan di Duin.

Cu la Ete dal Fier o vin i prins nons sigûrs di popui che a viverin te Furlanie: i Venits (-IX) e i Celtis (-V). Par sigûr i Venits a vevin rapuarts di cumierç cul Friûl, cemût che a testemonein lis robis cjatadis tai sgjâfs archeologjics. Par sigûr a jerin a stâ o a paronavin in dutis lis tieris dulintor. Invezit no savìn se a viverin intal Friûl.

Il popul dai Cjarnis al jere a stâ in mont (di lôr e cjape non la Cjargne), i Ambisonts a jerin tal cjanâl dal Lisunç, ma nol è clâr se chestis tribûs celtichis a rivarin fin al plan prin dal sec. -II.

Ancje i Venits e i Celtis si viôt che a rivarin in Furlanie de Europe di Mieç lantji daûr ae vie dal lambri.

Voris dopradis: Corbanese 1983; Paschini 1953-1954; Mumford 1961.