Storie: Rome e Aquilee

I fats

Tal principi dal -II secul o savìn che tes monts furlanis a vivevin i Celtis: Cjarnis e Ambisonts. No je clare la situazion tal plan. Chel che nus dîs Tît Livi al è che al jere un teritori dai Venits. Chest popul al jere di simpri in buinis cun Rome. Juste nol è mai stât vinçût in vuere dai Romans; al è vignût part dal imperi in chê volte des riformis aministrativis dal -I secul e i Venits a son passâts di sozis a citadins romans.

Dal -186, i Venits a clamin i siei aleâts romans parcè che, a disin, un grup di Gjai transalpins (Tauriscs?) a son daûr a fâ sù une citât tal plan. I Romans a mandin une armade e i Celtis a tornin vie cence combati. Rome dal -181 e met sù la colonie di Aquileia, ven a stâi Aquilee.

Parcè po i coventavie chê gnove colonie? In chel timp i Romans a jerin daûr a finî di cjapâ il control di dute la tiere des Alps fintremai la penisule apeniniche e di dut l¹Adriatic. La Furlanie e jere impuartante par tignî dut il Nord-Est di chê che di Otavian incà le clamin Italie.

Chel li al jere ancje un bon lûc par slargjâsi indenant vie pai paîs dilunc de Danau. Si lu viôt ben ancje tes stradis che lis àn metudis jù fin Aquilee (la Postumia, che e vignive di Piacenze) e di Aquilee in là (la Gemina, par lâ a Lubiane). Te ete romane a dopravin indenant ancje la vie che e leve sù pe Mont de Crôs. Une altre comunicazion une vore impuartante e jere la schirie di cjanâi di lagune che a menavin di Ravene fin sot Aquilee, tal puart di Gradus, ven a stâi Grau. Di lì si podeve rivâ sù a Aquilee pe aghe Natisse.

Daspò fate sù Aquilee, i Romans a comedarin ancje il rest dal teritori. Juli Cesar, prin di lâ te Galie Transalpine, al infuarcì i siei rapuarts inte Cisalpine, par che i siei riversaris no i sierassin la strade indaûr. Al metè sù il municipi di Forum Iulii, ven a stâi Cividât. Cul so non si pee ancje il municipi di Iulium Carnicum, ven a stâi Zui. Un altri municipi te Furlanie al fo Concordia, ven a stâi Concuardie.

I prins doi secui dal Imperi a viodin Aquilee a fâ di base pes spedizions transalpinis. Cuant, par altri, il stât roman al jentre in crisi, la colonie si cjate cjapade dentri intai diviers conflits, tant chei cui forescj che chei jenfri Romans.

Dal +169 i Marcomans, popul gjermanic che al jere a stâ in Boemie, a rivin a passâ la Danau e lis Alps, cussì che a assedin Aquilee, cence rivâ a cjapâle. L'invasion e met in clâr che e covente une gnove organizazion dal sisteme di difese: e nas une gnove regjon militâr, la Praetentura Italiae et Alpium, sot di un comes Italiae che al è a Aquilee. Inta cheste suaze si fasin sù gnovis liniis di fortificazion: i Claustra Alpium Iuliarum.

Plui dongje des gnovis fortificazions si cjate Forum Iulii, che cussì al tache a incressi la sô part. Sdrumade Aquilee dai Uns di Atile (452), il municipi al dovente il centri chel prin, la civitas (di chi il non 'Cividât').

La culture

La culture romane e je la fonde di chê furlane. Il so inflùs al fo massime chel di une culture plene di lustri che le puartavin i gnûfs parons e i sorestants. O vin di figurâsi, dut câs, che il procès di romanizazion si jere metût in vore za denant dal -181. Di chê altre bande, no podìn crodi che cun pocjis gjernaziis si vebi pierdude la culture dal lûc. Compagn che pe lenghe, dulà che si jere metût dongje un creol di fonde latine, cussì ancje pal rest si rivâ a miscliçâ tocs di dutis lis culturis, cun di plui che i Romans a vevin tirât sù ûs e tecnichis di ducj i paîs dal imperi e lu fasevin indenant.

No savìn ancjemò se a vebin vût stât ancje moviments impuartants di int. Al sarès interessant di savê di dulà vignirin chei che a slargjarin lis citâts. O savìn, par esempli, che Aquilee e veve ancje une comunitât greghe e une di Ebreus. Salacor i Ebreus a jerin a Aquilee dal secul -I, e a Cividât dal secul +V. Une sinagoghe e brusà a Aquilee dal +388. (Buora 1992:86; Corbanese 1987:402-417)

Al è facil di crodi che une buine part dai imigrâts di Aquilee a forin Celtis (se e je vere che la Basse no jere celtiche za di prime). Chel fat achì lu mostre ancje il lûc impuartant che intal panteon al tignive il diu Belenos ("divinitât 'nazionâl'" - Tavano 1986:18).

Par sigûr si viôt la olme de culture romane inte organizazion dal teren: no dome lis stradis e la dispartizion aministrative, ma ancje la centuriazion. No si trate dome di un fat formâl. Plui impuartante chi e je la idee de gjeometrie dal spazi e che l¹om al pues mudâlu daûr dal so mût di viodi.

Arts tipichis di Aquilee romane a forin chê dal lambri e chê dal veri.

Par chel che al tocje la leterature, un non di visâsi al è chel dal cividin Gai Corneli Gjal (-69/-27), il prin a scrivi elegjiis par latin. Om di Otavian, al ve la impuartantone incjarie di prefet dal Egjit, che al vignive di pierdilu Antoni. Vuastâts i rapuarts cun Otavian, si copà. Lis sôs voris a forin fruçonadis daûr dal volê dal imperatôr.

Voris dopradis: Buora 1992; Corbanese 1983; Marchetti 1974; Tavano 1986.