Il funtôr sintatic

[PDF]
Lis formis finidis dal verp furlan a son scuasit simpri cumbinadis cuntun elementut aton, che timp indaûr al jere un pronon aton. Cumò, par altri, chel elementut al à pierdût la funzion pronominâl. La sô funzion chê gnove e je in pratiche chê di judâ a interpretâ la struture sintatiche de frase.

Par chel o propon di clamâ chel elementut funtôr sintatic, ancje se lis gramadiis fintremai cumò lu àn clamât pronon (aton, subiet, pleonastic).

Chi sot le cjatais une tabele cun dutis lis formis libaris dal funtôr sintatic, ven a stâi chês formis che si lis metin denant dal verp. Lis formis che si tachin daûr dal verp a puedin sei un tic diviersis e a menin dongje fenomens fonosintatics. Par chel lis tratìn lì dai paradigmis verbâi.

Formis libaris

persone	nominatîf	gjenitîf	datîf	acusatîf	locatîf	istrumentâl	riflessîf
I sing.	o	Ø	mi	mi	Ø	Ø	mi
II sing.	tu	Ø	ti	ti	Ø	Ø	ti
III sing. fem.	e	indi, 'ndi ind, 'nd int, 'nt	i	le	i	parie	si
III sing. masc.	al	indi, 'ndi ind, 'nd int, 'nt	i	lu	i	parie	si
I plur.	o	Ø	nus	nus	Ø	Ø	si
II plur.	o	Ø	us	us	Ø	Ø	si
III plur. fem.	a	indi, 'ndi ind, 'nd int, 'nt	ur, i	lis	i	parie	si
III plur. masc.	a	indi, 'ndi ind, 'nd int, 'nt	ur, i	ju	i	parie	si

No + funtôr

La negazion no si le met simpri denant dal funtôr:
No lu vûl viodi.
No ju cognòs.
No si capìs.

Se il funtôr al scomence par vocâl a, e, o, la vocâl e cole:
Cun te no feveli!
No son i pacs che o spieti.
Marie no ven.

Atents: no + al = nol
Stiefin nol ven.

Se il funtôr al scomence par vocâl i, u, la vocâl inte pronunciazion e passe a semivocâl:
No i plâs. /noj/
No ur conte nuie. /nowr/