Il passât compost atîf

[PDF]

Il passât compost al è un timp che si cjate in ducj i mûts verbâi personâi (fûr che l'imperatîf): indicatîf, coniuntîf e condizionâl. In chescj mûts o cjatìn ancje il passât bicompost; tal indicatîf ancje il passât sempliç.

Il passât compost lu fasin doi elements: il presint dal verp jutori e il participi passât. I verps jutoris chi a son doi: jessi/sei e vê. Il participi al ven daûr dal presint (in poesie ancje l'incontrari).

Spieli.

• Indicatîf: o ai mangjât, tu sês lade, al à finît, aie spietât, vino fevelât, sêso rivâts, a àn volût;
• coniuntîf: o vebi mangjât, tu sedis lade, al vebi finît, vebie spietât, vebino fevelât, sediso rivâts, a vebin volût;
• condizionâl: o varès mangjât, tu saressis lade, al varès finît, varessie spietât, varessino fevelât, saressiso rivâts, a varessin volût.

Par chel che al tocje il verp jutori di doprâ volte par volte, o podìn cjoli tant che forme no marcade (che si dopre par solit) il verp vê. Pal rest dai câs o vin dôs situazions: i câs dulà che si scuen doprâ jessi/sei e chei dulà che al è compagn ce verp jutori che si dopre.

Si scuen doprâ il verp jutori jessi/sei cun chescj verps intransitîfs: lâ, zî, vignî, partî, rivâ, restâ, jentrâ, jessî, tornâ, murî, nassi, colâ, sflurî. (Cfr. Nazzi Matalon 1977:101)

Si pues doprâ il verp jutori jessi/sei inta chescj câs:

• cui verps jessi/sei e stâ (tu sês stât = tu âs stât, e je stade = e à stât);
• cui verps riflessîfs e chei altris pronominâi (tu ti sês lavât = tu ti âs lavât).

Atents!

• Il verp passâ cul obiet diret al dopre vê, se no, jessi/sei:
  • al à passât il libri a Stiefin
  • al è passât par Tisane
• I verps cul sens di finî e scomençâ pal plui a doprin vê. Par altri, se il subiet al è un procès che al rive insom o che al tache, si scuen doprâ jessi/sei:
  • al à finît il libri
  • par sigûr Pieri al à za finît
  • la storie e je finide
  • il film al è finît.

Doprant il verp jutori jessi/sei, il participi si acuarde simpri cul subiet:

la frute e je lade
il frut al è lât
lis frutis a son ladis
i fruts a son lâts.

Doprant il verp jutori vê, il participi si pues acuardâlu cul obiet diret o ancje lassâlu cu la forme dal masculin:

O ai cjatât une amie.
O ai cjatade une amie.

Se l'obiet diret al è pandût dal funtôr, l'acordi al è obligatori:

Le ai cjatade îr.
Ind ai cjatâts dîs.